Бөлүмдөр
Дүйшөмбү, 24-сентябрь
Баткен облусуБаткен району 24.02.2018 20:00

Өзбекстан менен чектешкен Сай айылынын тургундары президентке мектепти бүтүрүп берүүнү суранып кайрылышты

Turmush -  Баткен районунун Сай айылындагы Д.Акматов атындагы орто мектебинин окуучулары 4 жылдан бери 3 мөөнөттө билим алып жатышат. Бул тууралуу мектеп директору Азамбек Азимов билдирди.

Анын айтымында, 2014-жылы эски мектептин ордуна жаңы имарат курула баштаган. Бирок курулуш иши 3 жылдан бери токтоп турат.

«Эски мектеп 1977-жылы салынган. Анын бир корпусу жер титирөөдөн улам жараксыз абалга кептелип, колдонуудан чыккан. Мындан улам учурда 400дөй окуучу 150 орундуу мектептин корпусунда 3 мөөнөт менен окууга мажбур болуп жатышат. Абалдан чыгуу үчүн 2014-жылы айылга 250 орундуу мектеп салына баштаган. Бирок 2015-жылы курулшу токтоп калган. Жалпы сметасы 41 млн 700 сомду түзүп, бирок акча толук бөлүнбөгөндүктөн, 15 млн сомдук иш аткарылды. Эртерээк курулуш жанданбаса кирпичтер жаан-чачынга эзилип мектеп сапатсыз бүтүшү ыктымал», - деди директор.

Сай айылы Өзбекстандын Сох анклавы менен чектешип, айыл тоолуу, бороон чапкындуу. Жергиликтүү тургундар дагы чачыранды жайгашкандыктан балдар мектепке тоо аралап 5 чакырымдай аралыкты басып келишет.

«Биз 4 жылдан бери 3 нөөмөт менен эртең мененки саат 8:00дон кечки 20:00го чейин окуйбуз. Мен окууга эртең менен саат 7:00до караңгы болгонуна карабай жөнөйм. Болбосо саат 8:00до окуу башталып кечигип калам. Анан да бизде кошумча сабактар болбойт. Биз быйыл бүтүрүүчү класспыз. Жалпы республикалык тестирлөөдөн даярданууга класс жетишпейт», - деди 11-класстын окуучусу Белек Асан уулу.

Ал эми, Билим берүү жана илими министри Гүлмира Кудайбердиева аталган мектеп курулушу 2018-жылы бүтүрлүшү керек болгон мектептердин катарына киргендигин билдирди.

«Биз өкмөт менен Баткен облусундагы коллегияда бул маселени карадык. Быйылкы жылдын титулуна кирди. Д.Акматов атындагы мектеп быйыл сөзсүз бүткөрүлөт», - деди министр.

Элеттеги 400дөй окуучунун ата-энелери мектепте эртерээк куруп бүтүрүп берүү суранычы менен президент менен өкмөт башчыга кайрылуу катын жолдошту.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Сиздин реакция: Эркек Аял
Күлкүлүү
Капалуу
Таң калуу
Ачуулануу
Необходимо авторизоваться
Комментарии
Для добавления комментария необходимо быть нашим подписчиком
×