Turmush — Нарын облусунун Ак-Талаа районунда окуучулар үчүн «Жаркын келечекке кадам» аталышындагы ачык эшик күнү өттү. Бул тууралуу аймактык кабарчы билдирди.
Маалыматка караганда, Ак-Талаа райондук мамлекеттик администрациясы тарабынан өспүрүмдөр арасында кылмыштуулуктун алдын алуу жана кесипке багыт берүү максатында «Ачык эшиктер күнү» уюштурулуп, ага жалпы билим берүүчү мектептердин окуучулары катышты.
Иш-чаранын жүрүшүндө окуучулар Ак-Талаа районунун акими Мирлан Камчыбеков, райондук прокурор Бийкелди Акматов жана райондук ички иштер бөлүмүнүн башчысы Мирлан Шейшекеев менен жолугушту. Жолугушууда жетекчилер окуучуларды туура кесип тандоого, китеп окууга, билим алууга умтулууга, ошондой эле кылмыштан жана бейбаштыктан алыс болууга чакырышты.
Андан соң окуучулар райондук мамлекеттик администрацияга, тарых музейине, №40 Мааданбек Барашов атындагы кесиптик лицейге, Эмгек, социалдык камсыздоо жана миграция башкармалыгына, ошондой эле райондук ички иштер бөлүмүнө барып, алардын ишмердүүлүгү менен таанышышты.
Аким Мирлан Камчыбеков окуучуларды келечекте мамлекеттик кызматта иштеп, элге жана мамлекетке ак кызмат кылууга үндөдү. Ошондой эле аким болууну кыялданган окуучуну бир аз убакытка акимдин креслосуна отургузду.